• الحجاب:

البحر ما يوم زعّل مُوج

ولا يكسر له خاطر حُوت

…   …   …

• الوسمي:

لچَنْ بَـعـض البشَـر مَـغْـرُور

ايتِمَادَى ابغيّه لَجْل ابشُوت

…   …   …

• الحجاب:

اكو ميتين بس احياء

واكو احياء بس تابوت

…   …   …

• الوسمي:

العمر يرجع لَوَنْ هالنّوگ

ابخرم الإبره حين اتفوت

…   …   …

• الحجاب:

العمر شيفيد اذا شفنا ..

الرمل يضحك على الياقوت

…   …   …

• الوسمي:

الفَقِير اشْذنبه عينه اتْشُوف ؟!

يَـاكِـل خُبزته الطّاغُوت

…   …   …

• الحجاب:

شيقنع ناصر الخبزات

ان الدمعه تنزل صوت

…   …   …

• الوسمي:

إذا تحكي الكرامه اردود ..

غصُب يخرس لِسَانَه الموت

…  …   …

• الحجاب:

منو اليفهم حچيها اليوم

تسولف لكن امن اسكوت

…   …   …

• الوسمي:

الصّخَر يسمعني لُو ناديت

واظَل أبني ابسِمَانا ابيوت

…   …   …

• الحجاب:

ويضل الحجة باب الله

وبـ اللهم بس انفوت

…   …   …

• الوسمي:

نعم،.. هذا الولي الموعود

اليصِير ابصفّه ظَل مخبوت

…   …   …

• الحجاب:

عجّل بالفرج مولاي

تعب من الدمع لقْنوت

…   …   …

• الوسمي:

الزّمان ابلا وجودك صَار

كئيب ابلا قبَسْ مَبهوت

…   …   …

• الحجاب:

يمر اسمك على النبتات

ويدنگ راسه حتى التوت

…   …   …

• الوسمي:

يل نعتك عظيم الجاه

وإلك منّ الله كثره انعوت

…   …   …

• الحجاب:

اشكثر بينا ألم يونس

الدنيا في غيابك حوت

…   …   …

• الوسمي:

فلا يهنى العمر لُولاك

ولا يهنى ابغُيابك قوت

…   …    ...

• الحجاب:

غيرك غيّبَتْه الريح

وانته اعلى الوگت منحوت

…   …   …

• الوسمي:

تخضّر هالحياة اوياك

وبلا ماي الحياة اتموت

…   …   …

• الحجاب:

تعال الدنيا خنگه اهواي

ابّعدك هالخلگ مكبوت

…   …   …

• الوسمي:

نظل نحتاجك ابكل حِين

يَـ سر الله وتشِع لاهـوت

…   …   …

• الحجاب:

بعدك ضعنا ما نعرف

ياهو الناعي والمنعوت

…   …   …

• الوسمي:

النّصر حتمًا بدِيك ايلُوح

وتجيب انته نصُر طالوت

…   …   …