بلياك ماكو أي صبح

النور انته واعتقد

شمس الله ما تطلع إذا

ما تسمح تخليها

مو هي ردت من علي

گاللها ردي بنيتي

زينب تريد تشوفچ

وزينب فلا تزعليها

ومن يومها ذيك الشمس

مرتبطه بآل النبي

وكل مغربيه تلتفت

يمكن حد يناديها

ياجمعه تظهر سيدي

وتتغير الوان الشمس

خجلانه يالمهدي لأن

نورك يغطي عليها

يتعبني الصبر بس لا ما مليت

انتظرك واظل بالخير اتأمل

واسمع للأذان وكون اسمك بيه

ياجمعه وتكون الطلعه تتسهل

روحي سنبله والماي ويه الضوء

انته، والصبر يضربني بالمنجل

ويسوى هالصبر لو چان بذل الروح

على دربك تروح الروح هيچ اعدل

يا مهدي ضمينه نريد نروى اليوم

وندريك بعطشنه والله ما تقبل

بينه شلون لعبت سيدي الأيام

تمن علينه بالگطره وتشلنا شل

نزرع بالأرض ونريد خضره تكون

ما ينبت زرع ما ندري شنهو الحل

صرنه نعيش مثل البالنهر ويشوف

ضفه هناك ويحاول ولا يوصل

شايل چم ذنب مولاي أدري كثار

وآثار الجنيته خاف منها اعتل

خاف لغيبتك اسباب من اتطول

واني اصبح سبب، وياك واتفشل

واني بكل صبح من وگت افچ العين

ابدى بالتحيه عليك واتسأل

شلونك سيدي؟ الليل بارد چان؟

ما آن الأوان، اليوم تتفضل

وادعي تنفرج وكون كل لدروب

لحاجات البريه بيك تتعدل

اعرف تنگضي الشدات بمناجاك

اقرى اسمك على الصعبات واتحمل

واعرف مولدك، بس جيت بالدمعات

بدموع السعاده عليك ليش ابخل؟

امشي بصفنتي وبصماتي فوگ الكاع

من تخالط دموعي گلوب تتشكل

وشما مسأله فبالي يا مولاي

بسمك انتخي، والمسأله تنحل

اكبر معضله لو هو وجع مكتوب

بـ (اللهم كن) بالحال تتبدل

انه المايوم أيّس منتظركم

ولا فد يوم حاسب منتظر كم؟

يا آل البيت فدوه لمنتظركم

انا ابقى انتظره لحد المنيه