باسم العيثان .. 
ردت اكتب قصيدة وردني شخصك 
واذا بيك القصيدة اشلون اكتبْ
يلح بيّه القلم وهواي مشتاگ 
ناذر دمّه ليك بحرفه ينصّبْ
يعت بيّه وينازع إيدي كتبي
وحرت مابين ما أكتب وأكتبْ
واذا مو بيك ياحيدر يكتبون 
دگلي بيا وتر هالناس تكتبْ 
ومن غيرك وتر خلگ الله والكون ؟
إذا مثلك مثل والله لانصبْ
وإذا تكتب يحيدر بيك هالناس
بعيده أرواحها وتريد تقربْ 
لحدّك يالحدودك ساحل الروح
أوسع من حدود الجنة وأرحبْ  
القصيدة التذكرك يالخالد إكسير 
تعبر للخلود اليمك اقربْ 
لذلك من يكتبونك يخلدون 
وحرف باسمك يصيرن الها مطلبْ 
شما دامت قصيدة بغيرك تروح
بس بيك القصيدة تصير مذهبْ
تمذهبت بحروفك أنا وصفيت
قصايد بيك هاي اعضايه تُكتَبْ
وحقك ياعلي بس لو حروف تصير
دواوين بمحبتك روحي تنصبْ
أحبك ياعلي حب روس الأيتام 
لچفك لو مسحت وهي تنحبْ
احبك حب ينازع سيفك يريد
يصيرن نصل يقتل الف مرحبْ
أحبك ياعلي حب  تعصه ترجمته
على أفصح لسان شما شرح يتعبْ
مثل موضع سجودك ياعلي وياك
لوتغشاه غشيات المحب للحبْ
مثل قرص الشعير الخلّه جف يمناك
معبد بيه يستغفر لون أذنبْ 
رقعة ثوب لو رافتها جفك هاي   
حولتها قطيفة جنة للمعشوق تتذهبْ 
أحبك ياعلي حب خبزة التنور 
لبطون الجياع الإلها تتسغبْ 
أحبك ياعلي حب ماتصدگه الناس 
ابألله لو أحلف عليهم قالو تچذبْ 
أحبك يا علي حب هو خلاّني 
على جمر العشگ متونّس اتگلّبْ